Wie gëtt de "Lëtzebuerger vum Joer 2011"?

Dir hutt proposéiert an elo kënnt Dir decidéieren. A gewannen! Ënnert all deene Leit, déi sech aloggen a matofstëmmen, verspille mir 1 iPhone 4S 16GB Blanc an 1 iPad 2 16 GB Blanc vu LUXGSM.

Aus wäit iwwer 300 Proposen, déi mir vun Iech erageschéckt kruten, hu mir elo 25 real existéierend a méi oder wéineger bekannte Perséinlechkeeten ausgewielt, fir déi Dir elo stëmme kënnt. De Boxemännchen an d'Abriecher, déi 2011 anscheinend vill Opweises haten, hu mir awer net zeréckbehalen ;-)

Fir ze wielen: Loggt Iech w.e.g. mat Ärem VIP-Login op RTL.lu an, maacht Äre Choix an da kënnt Dir bis zu 6 Stëmme verginn. Zum Beispill 3 Stëmme fir Äre Favorit, 2 fir den Zweeten an 1 fir den Drëtten.

Wie bis den 31. Dezember (12h) déi meeschte Stëmme gesammelt huet, gëtt eise "Lëtzebuerger vum Joer 2011" a kritt d’Goldmedail, deen Zweete kritt Sëlwer, deen Drëtte Bronze. D’Resultat gi mir den 1. Januar 2012 bekannt – hei op RTL.LU!

Vill Spaass beim Ofstëmmen, bonne Chance beim Gewannen ...
... an elo scho schéi Feierdeeg an ee gudde Rutsch!

De Lëtzebuerger vum Joer 2011 - Voting

	Xavier Bettel Well hie mat groussem Erfolleg zum Stater Buergermeeschter gewielt gouf a fir eng méi jonk an dynamesch Politik steet.
	Dirk Bockel Den Triathlet huet beim Iron-Man alt nees bewisen, datt hie mat de Grousse mathale kann, mat enger exzellenter 4. Plaz
	Mady Delvaux-Stehres Fir esou eng Schoulreform ass definitiv vill Courage gefrot. Seelen huet eng Politikerin queesch duerch Gesellschaft fir souvill Diskussioune gesuergt.
	Marc Fischbach Den Ombudsmann huet ville Leit gehollef, wou aner Instanzen versot hunn. Hie stoung fir méi Rechtsstaatlechkeet an der Lëtzebuerger Verwaltung.
	Ierfgroussherzog Guillaume Op Wirtschaftsmissioune bereet hien d'Land mat op d'Zukunft vir, a mat senger sympathescher Manéier gëtt hien der Monarchie e jonkt a frëscht Gesiicht.
	Paul Helminger Fir seng gutt Aarbecht an der Stad Lëtzebuerg a seng Konsequenz an deem Moment, an deem de Xavier Bettel Buergermeeschter gouf. Dat war gréisst gewisen.
	Jeff Henckels Fir seng 6. Plaz op der Weltmeeschterschaft. De beschte Lëtzebuerger Bouschéisser war domat beschten Europäer. Och d'Olympia-Qualifikatioun ass gepackt!
	Änder Hoffmann Vu villen als ganz kompetente Politiker geschat, hat de lénken Deputéierten dëst Joer vill Geleeënheeten, fir virum Sozialofbau zu Lëtzebuerg ze warnen.
	Jules Hoffmann De gebiertege Lëtzebuerger Jules Hoffmann huet dëst Joer den Nobelpräis an der Medezin iwwerreecht kritt, fir seng Verdéngschter an der Immunologie.
	Äerzbëschof Jean-Claude Hollerich Deen neie Mann un der Spëtzt vun der Lëtzebuerger Kierch bréngt neie Wand a si eran a mécht vill jonk Leit op dat Positiivt vum Glawen opmierksam.
	Den Hoppen Théid Den Hoppen Théid (alias Marc Schmit) trëfft den Nol op de Kapp, a schwätzt dat aus wat mir Lëtzebuerger denken. Den Théid ass nach ee vun ons, vum Vollek.
	Jean-Claude Juncker Fir säin onermiddlechen Asaz fir den Euro. Och a schwéiere Krise behält hien d'Nerven an ass eng ganz wichteg Figur um europäesche, politesche Schachbriet.
	Bob Jungels De Bob Jungels huet de Sprong an d'Lëtzebuerger Continentalequipe Leopard Trek gepackt a gëtt als gréissten Talent am Lëtzebuerger Vëlossport gehandelt.
	Jeannot Krecké E Mann, deen zu all Zäit a sengem Liewen Entscheedungen geholl an dann och konsequent ausgefouert huet. Seng Energie a seng Aarbecht gehéiere gewierdegt.
	Mandy Minella D'Mandy Minella ass Sportlerin vum Joer 2011 an huet eng ganz erfollegräich Saison hannert sech. Si steet op der Plaz 111 am WTA Ranking.
	Gilles Muller De Gilles Muller huet et bis op Plaz 42 am ATP-Ranking gepackt, a koum bei de US Open bis an de 4ten Tour wou en du géint de Rafael Nadal verluer huet.
	Marie Muller D'Judoka Marie Muller konnt grouss Erfolleger bei internationalen Tournoien verzeechnen, sou z.B. eng Sëlwermedail beim Weltcup zu San Salvador.
	Desirée Nosbusch D'Désirée Nosbusch war eng dreiwend Kraaft am Projet "Weemseesdet", der éischter Soap am Lëtzebuerger Fernseh.
	Marie Anne Rodesch-Hengesch D'Ombudsfra fir d'Rechter vum Kand leescht ouni grouss Gedäisch eng gutt Aarbecht. Si ass riicht eraus, verléiert ni de gudden Toun a mécht keng Show.
	Andy Schleck Fir säi formidabelen Exploit beim Tour de France: Eng weider 2. Plaz an zesumme mat sengem Brudder Fränk um Podium - dat war einfach eemoleg!
	Fränk Schleck Genee esou wéi säi Brudder Andy huet de Fränk vill fir de Lëtzebuerger Vëlosport gemaach, stoung zu Paräis um Podium a gehéiert definitiv zu der Weltelite.
	Serge Tonnar Well hie mécht einfach gutt Lëtzebuerger Musek. A mat senger Band "Legotrip" ass him de Summerhit 2011 gelongen: Belsch Plage ... a bon voyage!
	André Urbing Well hien zanter Jore all seng Honorairen vun de Footballmatcher, déi hien als Arbitter kritt, fir de gudden Zweck spent.
	Sammy Wagner Als President vum Jugendparlament huet hien einfach dee richtege Posten: Hie vertrëtt d'Meenung vun deenen Jonken an setzt sech mat ganzem Häerz fir si an.
	Ranga Yogeshwar Fir d'Iwwerreechung vum "Deutschen Fernsehpreis 2011" an der Kategorie "Beste Information als Experte in der Fukushima-Berichterstattung"

Aus deenen iwwer 300 Maile mat Proposen, déi mir vun Iech eragemailt kruten, hu mir Iech hei driwwer – an alphabetescher Reiefolleg – eng Selectioun vu 25 Lëtzebuerger Perséinlechkeete presentéiert. Am Prinzip sinn et déi, déi am dackste proposéiert goufen, mä mir hunn awer och gekuckt, datt z.B. déi eenzel Beräicher vun der Gesellschaft vertruede sinn. Natierlech waren dat net all d’Virschléi, mee fir iwwersiichtlech ze bleiwen, hu mir eis op 25 "Finaliste" beschränkt.

Wie matofstëmmt, huet - wéi gesot - d'Chance, een iPhone 4S oder een iPad 2 vu LUXGSM ze gewannen!

Fir awer och deene villen, déi en Numm proposéiert hunn, MERCI ze soen, hu mir ënnert hinnen all ee flotte Buch-Package verloust an dee geet un de Paul Rippinger vun Ënsber!

Lëtzebuerger vum Joer 2009 an 2010 war iwwregens den Andy Schleck, 2008 war et - an der éischter Online-Wiel op RTL.lu - de Jean-Claude Juncker.