Exercice vum Groupe Canin vun der Lëtzebuerger Protection civile an Zesummenaarbecht mam THW vu Saarbrécken an de Pompjeeë "cynotechniques" vu Creuzwald (F) a vu Lohnstein (D) vum 17. bis den 20. Mee zu Lëtzebuerg an an der Groussregioun. D'Zil vun deem Treffen ass et, sech ënnereneen iwwert verschidden Aarbechtsmethoden auszetauschen.

Op Christi Himmelfahrt gouf zu Altwis um groussen "terrain de décombres" geübt. Et stoungen awer och nach Eenheeten an Däitschland an a Frankräich um Programm vun där Formatioun mat quasi engem operationelle Stage. A wéi wichteg Training ass, beweist dëse Saz: En Hond ass ëmmer nëmmen esou gutt wéi säin Hondsmeeschter. Déi zwee bilden een Team an dofir muss d'Kommunikatioun Mënsch-Déier ëmmer nees trainéiert ginn - dräi Mol pro Woch schaffen déi benevol Membere vum Groupe canin mat hiren Hënn.

Bei enger Sich no Vermësste mécht de Mënsch sech de Spilltrieb vum Mupp zu notzen. Doduerch gëtt dee motivéiert, no enger Persoun ze sichen. No 20 bis 30 Minutte muss den Hond awer ëmmer eng Paus aleeën, fir op seng Nues Rücksicht ze huelen a fir datt en d'Loscht un der Sich net verléiert. Dat wier nämlech ganz schlecht, well bei enger "Trümmersuche" kann et ëm Liewen an Doud goen ...

Fotoen: groupecanin.lu

LINK: Den Internetoptrëtt vum Groupe Canin.