Europaparlament: Aktiounsplang "Manner Affer am Verkéier"

RTL - 27.09.2011, 07:43 | Fir d'lescht aktualiséiert: 26.09.2011, 19:50

250 Fligeren, genee esou vill Leit sinn op den europäesche Stroossen bei Verkéiersaccidenter ëmkomm. Bréissel huet elo en Aktiounsplang ausgeschafft.

Zil war et, dat d'Zuel vun den Affer tëscht 2001 an 2009 ëm d'Halschent erof sollt goen. Zu Lëtzebuerg war dat de Fall, op europäeschem Niveau louche mer bei enger Reduktioun vun engem Drëttel. Fir déi nächst 10 Joer musse weider Mesure geholl ginn, sou dowéinst d'Kommissioun. Elo gëtt ënner anerem driwwer diskutéiert, ob an der ganzer Europäescher Unioun Tempo 30 an den Wunn-Quartiere soll recommandéiert ginn.

Dat wier dann eng Recommandatioun – hei soll näischt vu Bréissel imposéiert ginn, seet de Rapporter am Parlament, den Dieter Koch vun der däitscher CDU. Verschidden Tempo-Virschrëften an enger Uertschaft – dat kann och Duerchenee ginn, seet de CSV-Europadeputéierten Georges Bach, deen zu Stroossbuerg Member an der Verkéierskommissioun ass. Datt Tempo 30 eng wichteg Mesure ass, doriwwer si sech d'Deputéiert eens – och driwwer, dat d'Promill-Grenzen sollten eenheetlech an Europa sinn.

Tatsaach ass, datt et sech hei net ëm eng Recommandatioun, mee ee Gesetz géing handelen – dat heescht, déi Limite misst och zu Lëtzebuerg agefouert ginn. Proposéiert get och ABS fir Motorieder, ee Commemoratiounsdag fir d'Affer – wéi et en zu Lëtzebuerg scho gëtt.