Barroso: Propose fir Finanztransaktiounstaxe um Dësch

RTL - 28.09.2011, 10:15 | Fir d'lescht aktualiséiert: 29.09.2011, 06:38

Konkret huet de Kommissiounspresident eng Propose op den Dësch geluecht, fir eng Finanztransaktiounstaxe anzeféieren. Duerch dës Taxe kéint d'EU 55 Milliarden Euro am Joer erakréien. Et wier gerecht, Finanztransaktiounen ze besteieren. De Finanzsecteur wier ënnerstëtzt ginn, elo wier et un der Zäit, dat do eng Géigeleeschtung kënnt, sou de Barroso. De President vun der europäescher Kommissioun huet sech och dofir ausgeschwat, dat d'Decisiounen am Conseil anescht geholl ginn. D'Obligatioun, dat verschidden d'Decisiounen eestëmmeg geholl musse ginn, misst opgehuewen ginn. Dat ass zum Beispill a Steierfroen de Fall. Et kéint net sinn, sou de Barroso, dat déi Länner, déi méi lues sinn, déi aner ophalen. An Zukunft kéinten also och dës Decisiounen am Conseil majoritaire geholl ginn, dofir mussen awer déi europäesch Kontrakter geännert ginn.

Am Europaparlament gouf dann de Reformpak fir méi Budgets-Disziplin an der EU gutt geheescht. 6 Directive krute gréng Luucht mam Zil eng nei Scholdekris wéi a Griichenland ze verhënneren . Et sinn zum Beispill méi haart Sanktioune fir Länner virgesinn, déi hire Budgets-Defizit net ënner Kontroll kréien.

An Tëschenzäit klammen d'Chance vu Griichenland op eng weider Hëllefstranche an Héicht vun 8 Milliarden Euro. En Donneschdeg reesen d'Experten vun der EU-Kommissioun, der europäescher Zentralbank an dem internationale Währungsfong op Athen. Wa si hiren Accord ginn, kéinten d'Euro-Finanzminister am Oktober eng weider Kéier zesumme kommen an hiren Accord gi fir d'Geld ze iwwerweisen. Am anere Fall wier Athen Enn Oktober Faillite.

EU Kommissioun proposéiert Finanztransaktiounssteier. (28.09.2011)

Déi Steier kéint eng 55 Milliarden Euro d'Joer era bréngen, sou de President vun der EU Kommissioun de Moien virum Europa Parlament.