Voyage Emile Weber a Benelux Taxis lancéieren de Web-Taxi. Dësen neie Service gräift op Hybridautoen zréck a fonctionnéiert vun e Méinden u mat 15 Autoen.

Déi nei Webtaxien sinn Toyta prius Hybryd-Autoen, si sinn organge a wäiss. 15 Stéck fuere vum nächste Méinden un um Gebitt vun der Haaptstad. De Präis, fir d’Clienten, ass bis zu 30% méi bëlleg wéi déi normal Taxien. Dem webtaxi säi Kilometerpräis ass 2,5 Euro – 11% manner wéi déi konventionell Taxien.  De sougenannte Minuttepräis - wann den Taxi am Stau steet – fält beim webtaxi ganz ewech.

Als Beispill, en Trajet vun der Gare op de Kierchbierg, dee kascht mam webtaxi 17,6 Euro, géintiwwer 24,8 Euro mam normalen Taxi.  Extra Nuets- a Sonndestariffer bleiwen.

Eng nei, modern Reservatiouns- a Geolokalisatiounszentral soll fir de webtaxi ëmmer dee kierzte Wee garantéieren. A fir d’Clienten sinn d’Präisser transparent – beim webtaxi weess ee scho virun der Fahrt, wat et herno kascht, esou de Romain Kribs vu Voyages Emile Weber.

Romain Kribs: Dir kënnt iwwer app, iwwer web oder iwwer Telefon buchen. Där kënnt awer och virun Ärer Buchung Iech informéieren, wéi de Präis ass an da kënnt Dir selwer decidéieren, ob Dir dat mat oder net. Et ass net, dass Dir Iech lo hei an en Auto setzt wou Dir blann fuert. Ech denken, dass dat och ganz wichteg ass, dass dat virun der Commande gewosst ass, an dass de Client do kann decidéieren.

De webtaxi fiert um Gebitt vun der Haaptstad – a liicht driwwer eraus, zum Beispill bis op de Findel, wou d’webtaxien awer net an der Queue däerfe waarden. Et muss een extra ruffen. Bei méi wäiten Distanzen – vu Lëtzebuerg op Esch zum Beispill – falen déi méi niddreg Präiser ewech. Idem, wann een dee webtaxi an der Strooss unhält.

Romain Kribs: Da leeft d'Minuterie normal wéi bei engem normalen Taxi well deen Avantage vun der Zentral leider net ginn ass.