France 2 iwwer Lëtzebuerg: Reaktiounen a Géigereaktiounen
RTL - 23.10.2008, 16:29 - Fir d'lescht aktualiséiert: 24.10.2008, 22:48
De Reportage, dee France 2 de leschten Dënschdeg virun engem Interview mam Premier Jean-Claude Juncker gewisen huet, schléit nach ëmmer héich Wëllen.
Et sollt sech dobäi jo em eng Enquête iwwert "Luxembourg et son image de paradis fiscal" handelen, mee dat Zil gouf verfeelt - zumindest zu Lëtzebuerg, wou de Reportage fir vill Opreegung gesuergt huet.
Net nëmmen, datt sech de Premier live op France 2 iwwer dee Bäitrag beschwéiert huet, den Dag dono huet sech France 2 dofir och offiziell entschëllegt.
Déi franséisch Journalistenassociatioun SDJ an zwou Gewerkschaften hunn doropshin d'Directrice générale adjointe vu France2 schaarf kritiséiert a bedauert, datt d’Arlette Chabot sech schrëftlech beim Premier Jean-Claude Juncker wéinst dem Reportage iwwert de Lëtzebuerger Bankesystem entschëllegt huet.
De Reportage wier weder verleumderech nach inexakt gewierscht an hätt och keng falsch Informatioune verbreed, sou d’SDJ an engem Communiqué. D’Excuse wiren net ze justifiéieren a géifen Zweifel um Professionnalismus vun der Redaktioun vu France2 opkomme loossen. D’Roll vun enger Directrice de l’information géif an éischter Linn doraus bestoe, sech hannert d’Rekatioun ze stellen amplaz ze dénocéieren, sou déi franséisch Société de journalistes an déi zwee Syndikater.
Inacceptable, indigne, irresponsable, diffamatoire
Schonns en Donneschdeg hat d'Finanzkommissioun vun der Chamber eng "Prise de position du Parlement luxembourgeois" opgesat, déi et nawell a sech huet:
"La Chambre des Députés du Grand-Duché de Luxembourg tient à protester vigoureusement contre la manière dont a été présentée la place financière luxembourgeoise au cours du journal télévisé de 20 heures daté du 21 octobre 2008 sur France 2. Elle s'insurge particulièrement contre le reportage, la soi-disant “enquête” et sa mise en images, introduisant l'interview du Premier Ministre M. Jean-Claude Juncker. L'amalgame qui y a été fait entre “paradis fiscal”, “blanchiment d'argent” et “secret bancaire” est à ses yeux inacceptable et indigne d'un organe d'information qui se veut sérieux en général et d'une chaîne de service public en particulier. Il est par ailleurs irresponsable, voire diffamatoire dans la mesure où il suggère aux téléspectateurs de France 2 une image de la place bancaire qui ne correspond d'aucune manière à la réalité.
De façon plus générale, la Chambre des Députés récuse toute insinuation visant à discréditer le Grand-Duché de Luxembourg et sa place financière. Elle dénonce toute tentative d’établir une relation quelconque entre la crise financière actuelle et les activités développées par le secteur financier luxembourgeois, ce dernier n’étant de toute évidence pas à l’origine de la crise qui préoccupe le monde entier."
Reaktioune vu Parteien
En Donneschdeg hunn och d'CSV an d'adr op de France2-Baitrag reagéiert.
D'CSV seet sech besuergt iwwer déi tendenziéis an diffaméierend Berichterstattung. Et wiere Saachen aus hirem Kontext gerappt ginn, ob bewosst oder net ... An d'CSV stäipt och dem Premier de Réck.
D'adr ass der Meenung, datt een d'Bankgeheimnis verdeegegen a stäerken sollt a géint ongerechtfäerdegt Uschëllegunge protestéiere misst. Si appelléiert un d’Regierung, et der Schwäiz nozemaachen, an d’Ambassadeuren aus Däitschland a Frankräich ze convoquéiren.
De Lëtzebuerger Ambassadeur bei der OECD misst sengersäits kloer stellen, datt d'Glaafwiérdegkeet vun dëser Organisatioun um Spill steet. Vläicht missten esouguer finanziell a personalpolitesch Konsequenzen an der OECD geholl gin.
A wat soen se an der Lorraine zu deem Ganzen?
Dee kritesche Reportage op France 2 iwwert d’Lëtzebuerger Finanzplaz huet och an der franzéischer Lorraine fir vill Onrou gesuergt. Lëtzebuerg wor an deem Reportage jo als Steierparadies duergestallt ginn.
Dat huet ville Leit an der Lorraine net gefall. Well et hänke vill franzéisch Aarbechtsplaze vun der Lëtzebuerger Finanzplaz of.
De Claude Biwer, Buergermeeschter vun deem klengen Duerf Marville/Meuse (553 Awunner), ass als Sénateur zu Paräis zoustänneg fir déi grenziwwerschreidend Relatioun. A fir d’Lorraine, seet hien, sinn d’Relatioune mat Lëtzebuerg extreem wichteg. Virun allem, wéint den Aarbechtsplazen am Grand Duché. Vun den 130.000 Frontaliersen, déi op Lëtzebuerg schaffe kommen, si ronn d’Halschent aus Frankräich. Vill vun hinnen hunn déi franzéisch Attack op d’Lëtzebuerger Finanzplaz als nët ganz glécklech emfonnt.
De Claude Biwer betount dann och, dass hien, als Buergermeeschter an als Sénateur, nëmme gutts iwwert d’Lëtzebuerger Finanzplaz ka soen. Hien hofft, dass déi ganz Affär kee langfristege Schued verursaacht huet, an ass zouversichtlech, dass déi ganz Opreegung nees séier wäert eriwwer sinn.
