Groussalarm wéinst Zëmmerbrand e Samschdegmoien zu Péiteng

RTL - 02.06.2012, 08:37 | Fir d'lescht aktualiséiert: 02.06.2012, 08:45

E Samschdegmoien um 4h46 gouf Groussalarm bei de Péitenger Pompjeeën ausgeléist, dat wéinst engem Zëmmerbrand an der rue des Romains zu Péiteng.

E Living stoung hei a Flamen. Mat schwéierem Otemschutz gouf direkt ugefaangen ze läschen, an d'Awunner goufen evakuéiert.
Ausléiser vum Brand war eng Käerz déi vergiess gouf auszemaachen. D'Pompjeeën haten d'Feier séier ënner Kontroll a geläscht, well et awer eng staark Dampentwécklung gouf, huet d'Haus nach eng Zäit laang musse belëft ginn.

D'Pompjeeë ware mat 33 Mann an 8 Gefirer am Asaz. Op der Plaz war och nach d'Police vun Déifferdeng.