Kompromëss fonnt: Referenzdokter gëtt nei cibléiert. E soll sech an enger éischter Phas op eeler Leit a Leit mat chronesche Krankheete konzentréieren.

De Referenzdokter kënnt, allerdéngs just lues a lues.

D'Vertrieder vun den Dokteren an d'Gesondheetskeess si sech um Mëttwoch a leschter Minutt eens ginn, am anere Fall wier den Dossier op d'Geriicht gaang.

Dem Gesetz no kënnen all d'Leit e Kontrakt mat hirem Dokter ënnerschreiwen, mä an éischter Linn gëllt de Referenzdokter elo mol -der CNS no vum 1. Juni un- fir Leit, déi méi wéi 70 Joer hunn a fir Leit, déi chronesch krank sinn.

Hiren Dossier gëtt dann zwee Mol am Joer vum Dokter analyséiert an dee mécht dann och e Resumé vum Patient sengem Gesondheetszoustand.

Fir déi Leeschtung freet den Dokter dann een Tarif, dee méi héich ass wéi bis elo. Wéi vill Leit e Kontrakt mat hirem Referenzdokter ënnerschreiwen, ass schwéier soen. D'Gesondheetskeess rechent a Priori awer mat 80.000 Patienten.

Iwwert de Käschtepunkt fir d'CNS ass um Mëttwoch nach näischt gesot ginn.