Euthanasie: Grand-Duc Henri wëll d'Gesetz net ënnerschreiwen
RTL - 02.12.2008, 09:24 - Fir d'lescht aktualiséiert: 13.12.2008, 13:29
Et ass eng absolut Première zu Lëtzebuerg an ee Coup d’éclat a Saachen Euthanasie-Gesetz: RTL-Informatiounen no huet de Grand-Duc Henri wëlles, d’Gesetz iwwer déi aktiv Stierfhëllef net z’ënnerschreiwen.
An deem Fall kéint dat scho vill diskutéiert Gesetz net a Kraaft trieden, och wann d’Chamber et déi nächst Woch am zweete Vote stëmmt.
D'Politiker-Käpp dämpen ...
Den Dënschdegmoien hunn d'Käpp an de Fraktioune gedämpt. D'Deputéiert waren zesumme komm ... an et stoung net manner am Raum wéi eng Ännerung vun der Verfaassung a vläicht eng Entmuechtung vum Grand-Duc. Den Historique ass deen hei: De Méindeg sinn d'Fraktiounscheffe vun alle Parteie vum Hofmarschall bei de Grand-Duc geruff ginn.
Deen huet hinnen, jidferengem eenzel, gesot, hien géing d'Gesetz iwwer d'Euthanasie net ënnerschreiwen. De Grand-Duc huet no Propose gefrot, déi et him erméiglechen, dat Gesetz net ze ënnerschreiwen, dat heescht, et muss een iwwer eng Ännerung vun der Konstitutioun nodenken: An Zukunft, esou héiert een, solle Gesetzer a Kraaft trieden, wann
d'Chamber se an 2. Lecture gestëmmt huet - a net, wann de Grand-Duc se bannent engem Delai vun 3 Méint ënnerschriwwen huet. Dat heescht, de Grand-Duc wier op eng reng representativ Fonktioun reduzéiert; wann hien e Gesetz ënnerschreift, da nach just als eng Zort Notaire.
A just dowéinst soen eenzel politesch Responsabel a se kléngen och deemno, wa se et soen: D'Situatioun wier eescht, duerfir eben hunn d'Käpp an de Fraktioune gedämpt: Well et muss iwwerluecht ginn, op een de Grand-Duc iwwerried oder eben net, seng Pouvoirën ze behalen.
Den Enjeu ass also am Fong deen: Ass de Grand-Duc amgaang sech z'entmuechten? Léisst een dat zou? Kritt een dann eng institutionell Kris oder net? A wat wëll en am Fong?
Wat seet d'Constitutioun?
Laut Lëtzebuerger Constitutioun muss de Grand-Duc all Gesetz kontersignéieren, fir datt et a Kraaft triede kann. Am "Chapitre III. - De la Puissance souveraine" vun der Verfaassung heescht et nämlech am Artikel 34:
"Le Grand-Duc sanctionne et promulgue les lois. Il fait connaître sa résolution dans les trois mois du vote de la Chambre."
Dësen Artikel gëtt dem Grand-Duc immens vill Pouvoir – op där anerer Sait forcéiert hien de Groussherzog awer och an ee ganz enken Corcelet.
Marc Thewes: Historesche Moment
D’Recht, Gesetzer ze ënnerschreiwen, huet den Auteur Pierre Majerus a sengem bekannte Buch „L’Etat luxembourgeois“ als een Droit de Veto absolu duergestallt. Den Affekot an Enseignant op der Uni Lëtzebuerg, de Marc Thewes, widdersprëcht där Behaptung nët. Zu Lëtzebuerg gëtt an dëse Stonnen Geschicht geschriwwen, esou de Marc Thewes. Mat sengem Refus, d’Gesetz ze stëmmen, geet de Grand-Duc Henri nei Weeër.
An dee Précédent riskéiert elo gréisser Réperkussiounen ze kréien. Notamment well déi demokratesch Idee am Laf vun 140 Joer ëmmer méi zum Droen komm ass. 1868 war et gewollt, dass de Monarch nach méi ze soen hat. Dat ass haut net méi de Fall. Riets ass elo ënnert aanerem vun enger Verfassungsännerung fir aus der Sakgaass ze kommen. Mee dat geet net vun haut op muer.
De Marc Thewes huet donieft och nach gesot, dass et an dëser Situatioun nach immens vill Ongewëssheete gëtt. Et kéint zu enger constitutioneller an institutioneller Crise kommen – et kéint een awer och mat Besonnenheet a klorem Kapp eng Léisung fannen.
Är Commentaire
