TNS-ILReS-Sondage zur Demographie a Famill

RTL - 08.12.2008, 06:40 | Fir d'lescht aktualiséiert: 08.12.2008, 19:35

Zu Lëtzebuerg wiisst d'Populatioun v.a. duerch d'Immigratioun, soudass Friemer de Moment ronn 42% vun de Leit am Land ausmaachen (Sondage TNS-ILReS).

1961 waren et ronn 18%. An der Moyenne wënsche sech 52% vun der Populatioun zwee Kanner an d'Majoritéit wëll sech de Kannerwonsch am Alter tëscht 18 a 35 Joer erfëllen. Dat geet aus enger rezenter Emfro vun TNS-ILRES erfir. Et gëtt festgehal, datt d'Zuel vun de Kanner, déi sech Koppele wëllen uschafen, ëmmer méi zréck geet. An der Moyenne gëtt am Verglach mat de Generatioune virdrun, ee Réckgang vun 2 Kanner pro Koppel notéiert.
Grousse Succés huet iwwerdeems de Congé Parental. Wa virum Joer 2000 ee Véirel vun den Elteren op dës Form vu Congé zréckgegraff hunn, sou sinn et haut d'Halschend vun all den Elteren déi vum Congé Parental profitéieren. Eltere sinn, ass haut vill méi schwéier wéi an der Vergangeheet. 42% vun de Befrote sinn där Meenung.

Déi meescht Eltere passen iwwerdeems am léifste selwer op hir Kanner op, wann et méiglech ass, a ginn se net an eng Crèche oder bei eng Dagesmamm. D'Grousselteren spillen a 56% vun de Fäll eng wichteg Roll, wann et drëms geet d'Enkelkanner ze versuergen.

Wéi nach aus der TNR-ILRES Emfro erfir geet, spille Kanner nach ëmmer eng ganz wichteg Roll an eiser Gesellschaft. Fir 69% vun deenen iwwer 1.000 Leit déi gefrot goufen, si Kanner dat Wichtegst fir dat perseinlecht Gléck.