D'Chamber muss d'Finanzéierungsgesetz stëmmen, fir dass de Chantier 2014 wéi geplangt kann ugoen. Fir d'Rentrée 2017 soll den Tram da rullen.

De Projet vum Tram an der Stad ass zwar nach et op de Schinnen, mä bei alle gréissere Schantercher an der Stad gëtt uecht gedoen, datt och un den Tracé vum Tram geduecht gëtt.

Bis 2020 sollen e Véierel vun allen dagdeeglechen Déplacementer mam ëffentlechen Transport geschéien, an dozou soll, wann alles riicht räisst an der Stad den Tram gehéieren.

Wat sinn déi nächst Etappen?

No den techneschen Etuden, déi amgaangen sinn, muss d'Chamber dee finanziellen Volet ofseenen... an dee soll sech jo op eng 350 Mio EURO chiffréieren, wann et dann domat soll duergoen. Een Drëttel iwwerhëlt d'Stater Gemeng, de Rescht de Staat.

Zil ass et d'sougenannt monozentrescht Ufueren vun Arrêten duerch Bussen an der Stad via d'Gare oder den Hamilius mat der Saturatioun, déi domat verbonnen ass, ze léisen an duerch d'Offer vum Tram an net nei Bus-Linnen z'ergänzen. D'Bussen sollen de Stadzentrum evitéieren, woubäi nei Bus-Wiessel-Statiounen z.B. zu Bartreng um Tossebierg, zu Mutfert oder och um Quatre-Wang sollen bäi kommen.

Fir den Stater 1. Schäffen François Bausch ass elo d'Chamber am Dossier Tram gefuerdert.

D'Pro-Tram-Sympathisanten beleeën de Succès vum Tram mat Zuelen: esou huet en duebelen Trams-Waggon eng Capacitéit vun 450 Persounen – d'Equivalenz zu 340 Privatautoen oder och 4 Zieharmonika-Bussen. Net nëmmen an der Neier Avenue soll et da manner stauen: do wou an der Moyenne an all Richtung all 27 Sekonnen ee Bus fiert.

Den Ament a bis am Hierscht ass d'Etude iwwert d'Ëmweltinzidenzen amgaangen. Festgehalen ginn doranner Kompensatiounsmesuren, grad wéi eng Etude iwwert den Impakt op d'Stéck Gréngewald tëscht der Tréirer Autobunn an dem ale Findel, wou hei uewen um Kierchbierg d'Maintenanceshalen fir den Tram op 6 Hektar wäerte gebaut ginn.

D'Kafe vun den Tramwaggonen ass eng Saach, d'Exploitatiounskäschten duerno eng aner.

François Bausch: Déi gi geschat op ongeféier 20 Milliounen, datt do 1/3 d'Gemeng iwwerhëlt an 2/3 och de Staat. Woubäi een natierlech do muss soen, datt bei där Schätzung nach d'Recetten jo mussen ofgerechent ginn, sou dass een net op 20 Millioune wäert rauskommen.... D'Recetten déi rakommen maachen 1/3 aus vun de Käschten, sou datt een déi kann ofzielen. Da weess een ongeféier wat dat d'Gemeng an de Staat wäert kaschten.