Ass déi islännësch Landsbanki zu Lëtzebuerg elo faillite oder a Liquidation judiciare? A leeft do alles riicht? Déi Froe beschäftegen den Ament d’Aleba.

Et gëtt keng Scheedung am Gudden tëscht der Landsbanki Lëtzebuerg an dem Personal vun där islännescher Bank, déi jo d'Affer vun der Finanzkris ginn ass.

Sécher ass jo, dass déi Bank net méi ka gerett ginn an opgeléist gëtt, mee den aktuelle Statut interesséiert d'Banke-Gewerkschaft awer wéinst dem Personal, wat bis zum Schluss do geschafft huet.

Dass déi ronn 140 Leit, déi do geschafft hunn, hir Plaz verléieren, ass net ze verhënneren, "wéi" dat geschitt, doriwwer sinn d'Employéen awer guer net frou.

De leschte Freideg krute si gesot, d'Bank géif liquidéiert an et géif ee Sozialplang ausgeschafft ginn, scho Samschdesmoies war dat net méi richteg, dunn huet de Liquidateur op eemol vu Faillite geschwat an an deem Fall gëtt et kee Sozialplang. Aus enger Liquidatioun MAT Sozialplang ass also souzesoen iwwer Nuecht eng Faillite OUNI Sozialplang ginn.

Den Donneschdeg an der Mëttesstonn ass eng weider Reunioun vum Personal vun der Landsbanki Lëtzebuerg.

Den Ament fille sech d'Leit op alle Fall benodeelegt par Rapport zu den aneren 2 islännesche Banken: D'Glitnir ass jo iwwerholl ginn a d'Kaupthing kinnt nach in extremis gerett ginn, eng Decisioun ass hei drop an drun ...