Union Syndicale Luxembourg: 300 EU-Leit ginn op d'Barrikaden

Vun de 40.000 Leit, déi uechter Europa bei den europäeschen Institutiounen schaffen, hunn iwwer 10.000 eng éischter onsécher Situatioun. Dat soll änneren.

Si schaffen op der Basis vun engem temporären Contracte a risquéieren, dëse Contracte no e puer Joer net méi verlängert ze kréien.

Iwwer 300 vun deene Concernéierte sin elo vru Geriicht gaangen - si werfen der Kommissioun vir, si géif Fonctionnaires-Plaatzen aspueren an ëmmer méi mat Contrats à durée déterminées fueren.

An zwar géing et, sou den Affekot vun de Betraffenen, net em temporär Aufgaben mee em Tâchen, déi permanent ufalen. Fir déiselwescht Aarbecht ewéi d'Fonktionnairen gëtt da vill manner bezuelt, sou d'Sylvie Jacobs vun der Union Syndicale.

Aleng an der Kommissioun si méi ewéi Dausend Leit betraff, dat ass illegal, seet den Miguel Vicente Nunez, den General-Sekretär vun der Union Syndicale Luxembourg.

Virun allem de Statut vum Agent Contractuel, dee vru 4 Joer agefouert gouf, ass net un ee Posten gebonnen. D'Leit kënne flexibel agesat ginn. Si verdéngen zum Deel iwwer 1.000 Euro de Mount manner wéi Agent temporairen, déi datselwescht maachen. D'Prozesser géint des Inegalitéit lafen zanter e puer Joren, sou d'Sylvie Jacobs.

Et gëtt kee Gesetz, dat vierschreift, dat aus engem temporären Contracte een à durée indéterminée gëtt, soten elo d'Vertrieder vun der Kommissioun. Si géife sech un d'Aarbechts-Statuter vun der Kommissioun halen. Déi sin net konform mat de Gesetzer, déi d'Kommissioun de Memberlänner virschreift, soen d'Affekoten vun der Géigesäit. Och Employeen vun den europäeschen Institutiounen wieren europäesch Bierger.

Wéini d'Uerteel an dëser Affaire gesprach gëtt, ass nach net kloer.