Méi laang autonom: nei Technologië fir eeler Leit

De Reseau "Help" an de Grupp "G4S" schaffen an Zukunft zesummen. Deen een versuergt d'Leit, deen anere suergt fir hir Sécherheet ...

... an zesumme wëlle se ganz einfach erreechen, datt eeler Leit méi laang autonom a sécher an den eegene véier Wänn kenne liewen. De Dënschdeg gouf explizéiert, wéi dat soll goen.

3 technesch sophistikéiert Apparater sollen Autonomie a Sécherheet verbesseren. Do geet et un éischter Plaz, wéi gesot, ëm eeler Leit ma am Fong geholl ëm jiddwereen, dee permanent oder temporär ënnert enger ageschränkter Mobilitéit leit.

Déi Instrumenter sinn éischtens eng Zort Handy, deen awer anescht ewéi den Telealarm, eng universell Zorte Noutruff ass.

Da gëtt et een elektronesche Schlëssel via Spezialcode um Handy an drëttens sinn et Kameraen, déi an der Wunneng installéiert ginn an eng Kontroll vu baussen erméiglechen, virausgesat natierlech, Famill a Concernéierter selwer sinn d'Accord.

Mat deene Produite soll d'Offer vun Help nach besser a nach méi breet ginn, sou de John Castegnaro, President vun Help. Op kee Fall awer sollen déi nei Technologien op Käschte vun der Mënschlechkeet goen.

Déi nei Technologië maachen duerchaus Sënn, do muss jiddwereen elo kucken, wat hien brauch.

Da stellt sech direkt awer natierlech och d'Fro vum Präis. Net onwiesentlech, allerdéngs kann een do schwéier an 10 Sekonnen eng Äntwert ginn. Jee no Apparat a jee nodeem, ob een ee keeft oder lount, variéieren déi Präisser. Dofir ass et am beschten direkt bei Help oder beim Grupp G4S nofroen.