Stater Budgetsprojet: Rout Zuelen a Rekordinvestitiounen
RTL - 07.12.2009, 23:11 - Fir d'lescht aktualiséiert: 07.12.2009, 23:29
Zanter 12 Joer schreift d'Gemeng Lëtzebuerg 2010 erëm rout Zuelen: Am Budget fir dat anert Joer ass e Minus vun 63,4 Milliounen Euro virgesinn ... de rektifizéierte Budget fir de lafenden Exercice läit esouguer bei engem Defizit vun 72,8 Milliounen Euro ... bal d'Halschent dovunner – ronn 35 Milliounen – ginn awer op de Kont vum Gebai vun der 'Luxembourgeoise' um Boulevard Royal, dat d'Gemeng dëtt Joer kaf huet.
Um Héichpunkt vun de gëllene Joer – 2007 – huet d'Stad kënne 60 Milliounen Euro an hire 'Fonds de renouvellement' stiechen, dat sinn d'Reserven, déi elo bei 125 Millioune leie, ma net méi laang.
Wann d'Defiziter vun dësem a vum nächste Joer nämlech equilibréiert gi sinn, bleift dovunner näischt méi iwwreg, well de rektifizéierte Budget 2009 soll mat engem Defizit vun 72,4 Milliounen ofschléissen an dee vum anere Joer mat 63,4 Milliounen. Bei den 72,4 Millioune mécht de Kaf vum Gebai vun der 'Luxembourgeoise' allerdéngs ronn d'Halschent vum Minus aus.
Esou wéi beim Staat, gëtt och an der Stad gespuert, awer net 2011 ma direkt bei de Fonctionnementskäschten. 40 Milliounen am Verglach mat 2009. Zanter dem Summer ass ganz genee gekuckt gi, wou ka gestrach gi, seet de Buergermeeschter Paul Helminger.
Mam Resultat: Op den 31. Dezember vum nächste Joer huet d'Stad nach ëmmer keng Sue musse léinen, fir d'Defiziter ze droen, esou de Finanzschäffe François Bausch. Obwuel weider massiv investéiert gëtt: dat anert Joer iwwer 170 Milliounen.
'Dat ass e Rekord', sot de Finanzschäffe François Bausch um Méindeg bei der Presentatioun vum Budget am Gemengerot.
Ma di blo-gréng Majoritéit wollt den Invest dat anert Joer eben express héich halen, esou de François Bausch. D'Gemeng wier sech hirer Responsabilitéit vis-à-vis vum Land an och vis-à-vis vun de klengen a mëttleren Entreprise nämlech bewosst.
E groussen Deel vun den Investitioune si fir d'Mobilitéit: z.B. 12,7 Millioune fir de Lift an de Pafendall; 10 fir de Betribsleitsytem vun de Bussen oder 4 Millioune fir d'Gesellschaft, déi den Tram preparéiert.
Och an d'Kannerbetreiung soll investéiert ginn. A vun de Kanner ass et net wäit ewech bei den onzefriddene 'comité de cogestion' vun den Enseignanten. De Paul Helminger versteet dat net, well bei all Service gestrach ginn ass.
De François Bausch seet, datt kengem Enseignant bis elo een Hoer gekrëmmt ginn ass an kee Kand ënnert de Aspuerunge leide muss. An d'géing déi aner Joer nach vill méi schlëmm, mat de Finanzen.
De Freideg gëtt um Knuedler iwwert d'Zuele vun 2010 debattéiert. De Méindeg drop äntwert nach eemol de Schäfferot an da kënnt de Budget zum Vote.
Är Commentairen
