Haiti: Lëtzebuerg gëtt 500.000 Euro Direkthëllef fir Hëllefsorganisatiounen, 700.000 Euro fir konkret Projeten an 3 Mol 500.000 Euro fir den Neesopbau.

Fir den Affer vun deem fuerchtbaren Äerdbiewen den 12. Januar 2010 op Haiti ze hëllefen, huet Lëtzebuerg eng finanziell Nouthëllef iwwer 1,2 Milliounen Euro decidéiert. Déi Sue sollen zesumme mat de Partner am humanitäre Beräich agesat ginn.

An enger 1. Phas gouf eng hallef Millioun Euro accordéiert:

- 200.000 Euro fir de "Programme alimentaire mondial" (PAM): Hei geet et ëm Liewensmëttel;
- 50.000 Euro fir Objectif Tiers Monde: Drénkwaasser, Iessen a medezinnescht Material;
- 50.000 Euro fir d'Fondation Caritas Luxembourg: Prise en charge vun engem " camp de déplacés";
- 100.000 Euro fir Care Lëtzebuerg: Drénkwaasser a provisoresch Abrien;
- 50.000 Euro fir d'Hëllefsequipe vu Protection civile a Croix-Rouge;
- 50.000 Euro fir d'Emergency Rescue Unit (ERU) vun der Croix-Rouge.

Kuerz dono huet d'Ministesch vun der Cooperatioun an der Action humanitaire en zousätzleche Montant iwwer 700.000 Euro zougeséchert:

- 200.000 Euro fir d'UNICEF (protection des enfants, eau et assainissement);
- 200.000 Euro fir Handicap International Luxembourg: appui hospitalier, fourniture d’aide à la mobilité, kinésithérapie;
- 150.000 Euro fir Médecins sans Frontières Luxembourg: soins médicaux;
- 100.000 Euro fir d' Croix-Rouge luxembourgeoise: 2.000 «shelter kits»;
- 50.000 Euro fir SOS Villages d’Enfants Monde Luxembourg: nourriture, médicaments, vêtements, soins de base, support psychologique.

Weider huet d'Regierung decidéiert, am Zäitraum 2010 bis 2012 all Joer 500.000 Euro fir den Neesopbau vum Land ze stellen.

D'Regierung wëll d'Situatioun sur place och weider am A behalen a hir Hëllef bei Bedarf un d'Besoinen upassen.