Petitioun: Den Norddeel vun der "National 7" ass total iwwerlaascht an immens geféierlech, sou den LCGB Norden! D'Sécherheet muss onbedengt verbessert ginn

Si hätt gäre Verbesserungen op der 3-spuereger Schnellstrooss tëscht Ettelbréck an der belscher Grenz. All Dag giffen tëscht 15- an 18.000 Autoen driwwer fueren.

Ze vill Ausfahrten, Rond-Point'en, Passagen an Dierfer an Iwwerhuelverbueter giffen den Trafic stéieren – fënnt den Carlo Wagener, Gewerkschaftssekretär vum LCGB Norden. Si fuerden e 4-spueregen Ausbau mat enger Trennung vun deene Spueren fir Accidenter mam Géijeverkéier ze evitéieren. Da sollen d'Lénksofbéi-Virgäng duerch Iwwer- bzw Ënnerführungen evitéiert ginn, an d'Uertschaften op der Streck sollen duerch Contournementen entlaascht ginn.

Eng Autobunn soll et awer net ginn, well den landwirtschaftleche Verkéier och weiderhin iwwert déi Strooss fuere muss.

Fir datt et an dësem Dossier endlech virugeet, lancéiert den chrëschtlechen Gewerkschaftsbond elo eng Petitioun.