Greenpeace Lëtzebuerg: Neie radioaktiven Offall zu Cattenom

RTL - 09.02.2010, 12:00 | Fir d'lescht aktualiséiert: 09.02.2010, 12:09

Greenpeace Lëtzebuerg mécht sech Suergen ëm de radioaktiven Offall vun der Atomzentral zu Cattenom, wéint enger zukünfteger Ëmstellung vum Brennstoff.

Déi franséisch Autoritéiten hunn nämlech de Feux Vert gin fir zu Cattenom en aneren Type vu Combustible ze benotzen. Deen neie Produit vum Type "Galice" géif 30 Prozent méi Décheten verursaachen, an d'Ëmwelt géif massiv belaascht, esou Greenpeace.

Vue dass Cattenom, déi eenzeg Zentrale a ganz Frankräich wier, wou gëfteg a radioaktiv Stoffer an enger Baach landen, hätt déi Ëmstellung och en Impakt op d'Regioun.

An deem Kontext adresséiert sech d'Ëmweltorganisatioun un de Gesondheetsminister Mars di Bartolomeo. Greenpeace wëll vum Minister wëssen, ob hien iwwer dës Ëmstellung informéiert gouf, an ob d'Regierung präzis Donnéeë krut, wat den Impakt fir d'Emwelt betrëfft.