Xynthia: D'Protection Civile hat um Sonndeg eng 3.000 Appeler. Um Dënschdeg sinn ëmmer nach Stroosse gespaart. An Europa koumen iwwer 50 Leit ëm d'Liewen.

5 liicht Blesséierter zu Wolz, zu Käl an tëschent der Kräizerbuch a Schweech. Dat ass dee leschte Bilan um Dag, nodeems de Stuerm Xynthia am Grand-Duché ukomm war.

Bei der Police an an der Zentral vum 112 huet den Telefon um Sonndeg méi wéi 3.000 Mol gerabbelt.

D'Hëllefsdéngschter sinn 760 Mol erausgefuer, an der Haaptsaach wéinst Beem, déi ëmgefall waren, an Hausdiecher, vun deenen Zillen erof geflu sinn.

D'Stater Beruffspompjeeën hate 95 Asätz wéinst dem Stuerm. Si goufen ënnerstëtzt vu fräiwëllege Kollegen.

D'Pompjeeë vun Esch-Uelzecht waren vun e Sonndeg de Moien 11 Auer bis owes 19 Auer permanent am Asaz. 39 mol hu se missen erausfueren. Um Meindegmoien haten d'Escher Pompjeeën nach eng Kéier 7 Asätz wéinst dem Stuerm: Dachleeën a Blecher, déi lass waren, vun den Diech huelen.

D'Rettungsdéngschter hunn awer och 15 Leit aus dem Bësch missten eraushuelen, well dës Leit trotz de Warnunge vun der Police gemengt haten, si missten en Ausfluch dohinner maachen.

Assurancen nom Stuerm

No dem schlëmme Stuerm lafen um Méindeg d'Leitunge bei den Assurancen natiirlech op Héichtouren, ewéi den Claude Schwarz vum Foyer eis confirméiert.

Problemer am Trafic um Sonndeg ... a Méindeg... an Dënschdeg

Xynthia huet kräfteg iwwert d'Land ewechgeblosen. Zu Beetebuerg goufen am Nomëtte Spëtze vu méi wéi 120 Kilometer an der Stonn gemooss.

Géint 18 Auer um Sonndegowend hat d'Situatioun sech nees berouegt.

Xynthia huet och fir masseg Problemer am Trafic gesuergt, op de Schinnen, an der Aviatioun an natierlech op de Stroossen.

- E Sonndeg sinn d'Volen an Directioun Paräis, Zürich a Las Palmas ofgesot ginn, grad ewéi déi selwescht Volen an déi aner Richtung also zréck op Lëtzebuerg.

- Zu Lëtzebuerg selwer war d'Bunn zwar verschount bliwwen, anescht am noen Ausland. Den Zuchverkéier hanner Tréier, also zum Beispill op Koblenz, war komplett zesummegebrach; aus deem Grond ass d'CFL och eng Zäit laang net op Tréier gefuer. Déi nämmlecht Problemer gouf et an der Belsch. Do ass d'CFL e Sonndeg de Mëtten nëmmen nach just bis op Arel gefuer. Keen Zuch ass also op Bréissel gefuer.

Stroosse gespaart

En Deel vun deene Strécken, déi am Laf vum Sonndeg gespaart goufen, waren och nach um Méindegmoien zou. Hei d'Situatioun vum Dënschdegmoien 07.30 Auer:

Recken - Huelmes,
Blaschent – Plankenhaff,
Mamer – Koplescht (zou bis Donneschdeg, 17 Auer),
Kleng-Elcherot – Kolpech – Holtz (bleift nach 3 Deg zou)
Rued – Nidderkolpech (nach 3 Deg zou)
Holtz – Pärel,
Grondhaff – Blummendall. 

D'Streck tëscht Koplescht a Schëndels ass zanter en Dënschdegmëtteg 15 Auer nees op.