Avortement: Petitioun, fir méi wäit wéi Gesetzprojet ze goen

Petitioun 'Si je veux' fir d'Selbstbestëmmung vun der Fra: 112 Leit aus der Zivilgesellschaft wëllen, datt d'Reform vum Avortementsgesetz méi wäit geet.

Fir oder géint Ofdreiwung? Wat soll erlaabt, wat verbuede sinn oder ginn? Genee wéi an Amerika, Spuenien a villen anere Länner gëtt doriwwer den Ament och zu Lëtzebuerg diskutéiert.

© AFP (Archiv)

Ënnert dem Titel "fir d'Selbstbestëmmung vun de Fraen - si je veux" ass elo eng Petitioun lancéiert ginn, déi verlaangt, datt d'Reform vum Avortement méi wäit geet, wéi den aktuelle Gesetzprojet vun CSV a vun LSAP dat virgesäit.

Am éischten Opruff, dee vun 112 Leit aus dem ëffentleche Liewen, ënnerschriwwe ginn ass, gëtt d'Entkriminaliséierung vum gewollte Schwangerschaftsofbroch verlaangt. An d'Recht vun der Fra op Selbstbestëmmung.

Initiéiert ginn ass d'Petitioun vum Kollektiv "Si je veux – Fir d'Selbstbestëmmung vun der Fra". Ënnerschreiwe kann een op sokrates.lu.

D'Petitioun an dräi Deeler agedeelt

Den éischten ass de kierzten: Do fuerderen déi Fraen a Männer, déi ënnerschriwwen hunn, ganz einfach, datt den Avortement net méi kriminaliséiert dierft sinn an d'Frae missten d'Recht iwwer sech selwer kréien.

Op engem zweete Punkt deklaréiere si konsequenterweis, se wiere géint dat geplangten neit Gesetz, well de Fraen doranner nach ëmmer penal Suitë fir den Avortement ugedreet ginn a well weider eng Indikatioun, also e psycheschen, physeschen oder soziale Problem, misst gi sinn, fir datt d'Fraen iwwerhaapt d'Recht op en Avortement hätten.

Och d'Klausel, datt eng Fra dräi Méint am Land wunne muss, fir kënnen ze avortéieren, déi Klausel misst aus dem Gesetz verschwannen.

Gefuerdert gëtt dann an engem drëtte Schrëtt, datt jidder Fra, déi dat wëll, bannent enger bestëmmter Zäit misst kënnen avortéieren – dat ass déi faméis Fristeléisung.

Gefuerdert gëtt och eng uerdentlech medizinesch a psychologesch Berodung an zwar virum Avortement an och duerno. An d'Käschte fir en Avortement soll d' Gesondheetskeess iwwerhuelen.

Är Commentairen

D'Commentairer gi gelueden, ee Moment w.e.g.!