N. Schmit: An den Spuerproposë vun der Regierung hunn d'Famille mat Kanner d'Haaptlaascht ze droen an dat ass net am Sënn vun deem, wat mer wollte maachen.

Wéi fannt Dir
dësen Artikel?

60.12%

39.88%

341 Vote(n)

Et misst serieux nogebessert ginn un deem Spuerpak, deen och ni als definitive Pak vun der Regierung ofgeseent gi wär.

Et muss eng Marge gi fir an aner Richtungen ze schaffen, op anere Plazen also ze spueren, esou den LSAP-Minister.

Och fir den Alex Bodry waren am Pak, deen de Finanzminister Luc Frieden en Dënschdeg presentéiert huet, nei Elementer dran. Hien deelt den Androck vum Nicolas Schmit, dee Pak wier net equilibréiert.

Et wier net gutt gewiescht, dat d'éischt d'Gewerkschaften d'Spuer-Proposen presentéiert hunn, an dono d'Regierung dat kommentéiert an nach eng Kéier gemaach huet.

Ob et ee Problem an der Koalitioun gëtt, kéint een elo nach net soen, sou den LSAP-President. Spéitstens dee nächste Mëttwoch, wann d'Regierung mat den LSAP an CSV- Partei- a Fraktiounspresidenten a Klausur geet, missten d'Kaarten op den Dësch kommen.

John Castegnaro

De Spuerpak, deen en Dënschdeg virgestallt gouf, ass net akzeptabel, seet den fréieren OGBL-President an fréieren LSAP-Deputéierten John Castegnaro.

Et wier ze verstoen, dat d'Gewerkschaften mat den Detailer un d'Ëffentlechkeet gaange sinn.

De Jean-Claude Juncker sollt elo d'Rudder an d'Hand huelen an eventuell mat de Gewerkschaften an de Patronsen getrennt verhandelen. Méiglecherweis misst och den Datum vum 4. Mee fir den Etat de la Nation verluecht ginn.

Biergerlëscht

D'Tripartite ass een Trauerspill sonnergläichen, iergert sech d'Biergerlëscht an engem Communiqué. Si refuséiert d'Propose schaarf an ënnerstëtzt all Beweegungen déi sech wëlle wieren.

D'Gewerkschafte wieren an der Verantwortung. Den OGB-L dierft op kee Fall faul Kompromësser unhuelen a soll de Generalstreik ausruffen wann et muss sinn.

Beim LCGB misst ee sech froen ob en nach glaafwiirdeg ass, vu dass de President gläichzäiteg CSV-Députéierten ass. Et dierft een elo scho gespaant sinn, wéi dee sech bei engem Vote an der Chamber behëlt.

Jongsozialisten

D'Jongsozialisten hu sech elo zu Wuert gemellt. D'CSV misst sech schummen, heescht et am Communiqué. Et wier eng onverantwortlech Haltung an de Koallitiounspartner géif nees säi machiavelistescht Gesiicht weisen.

D'JSL stellt sech hannert d'sozialistesch Ministeren a begréissen d'Interventioun vum Komerod Nicolas Schmit.

Et misst alles gemaach ginn, fir dësen ongerecht verdeelte Sozialofbau z'évitéieren.

Déi Gréng

Dat wat den Ament an der Regierung passéiert ass „du jamais vu“, seet den gréngen Deputéierten François Bausch.

Dat hei wier dee wichtegsten Dossier, deen zanter laangem am politesche Raum zu Lëtzebuerg diskutéiert gouf. A wann d'Regierung sech bei esou Affären net eens gëtt, dann ass dat e schlecht Zeeche fir d'Lëtzebuerger Land, esou nach emol de François Bausch.

Reaktioun vum Jean-Louis Schiltz

De Fraktiounschef vun der CSV, de Jean-Louis Schiltz, gesäit no dësen Aussoen zwou Méiglechkeeten: E Stuerm am Waasserglas oder eng Kakophonie.

Ëm wat geet et?

Déi ugeduechte Spuermesurë vun der Regierung suerge fir hefteg Reaktiounen: CSV & LSAP nuancéieren, d'Oppositioun kritiséiert, d'Gewerkschafte refuséieren.

Dem Finanzminister Luc Frieden no gëtt an den nächste 4 Joer de Punktwäert an der Fonction publique net eropgesat. Dat heescht, beim Staat gëtt et bis 2014 mol näischt an der Pai bäi.

De Finanzminister huet en Dënschdegmoien op enger Pressekonferenz gréisstendeels déi Mesurë vun der Regierung confirméiert, déi d'Gewerkschafte den Dag virdrun - an der Fouléee vun der 3. Tripartite-Ronn - schonn ugekënnegt haten.

De Luc Frieden seet, dass dee Pak absolut néideg ass, fir d'Zil vun Null Defizit bis 2014 an keng Scholdelaascht vun iwwer 30 Prozent z'erreechen an un deem Zil géif egal wéi net gefréckelt.

No de Reaktioune vun de Gewerkschafte stellt sech d'Fro, op dann een Accord an der Tripartite nach méiglech ass ...

Et geet an déi falsch Richtung. Wat d'Mesuren ugeet, déi bis ewell aus der Tripartite ze héiere sinn, ass dat eng Meenung, déi ee méi dacks héiert.

Et geet an déi falsch Richtung besonnesch och am Kontext vun der Lutte géint d'Aarmut bei de Jonken. Dat seet d'LSAP-Deputéiert Vera Spautz, déi sech besonnesch am soziale Beräich engagéiert.

Wann dat, wat an der Tripartite bis elo um Dësch läit, wierklech sou emgesat gëtt, dann hat déi Debatt net vill Sënn, sou d'Vera Spautz.

D'LSAP-Politikerin weess awer a wéi eng Direktioun et kéint oder souguer misst goen goen. Eent steet fest, sou d'LSAP-Deputéiert Vera Spautz, dat wat elo um Dësch läit, kann et net sinn.

LCGB: Eestëmmegen Nee

Den Zentralcomité vum LCGB huet en Dënschdegowend d'Spuerproposë vun der Regierung eestëmmeg zeréckgewisen.

De chrëschtleche Gewerkschaftsbond wëll zwar weider an der Tripartiteverhandelen, mä de Mesurëpak, wéi en elo um Dësch leit, wier net akzeptabel.

Den Zentralcomité ass och net domadder averstan, datt 1/3 vun de Suen déi solle gespuert ginn, duerch Steiererhéijungen erakommen an 2/3 duerch manner Depensen, well hei ganz kloer nees eemol d'Salarié'en bestrooft ginn, ënnersträicht d'Gewerkschaft.

Si refuséiert och all Manipulatioun, Modulatioun oder Modificatioun vum Index Wuerekuerf.

Famill 2000: Keng Sanéierung op Käschte vun de Familljen!

Vun den 20 Spuer-Propose viséiere 7 Stéck d'Familljen. Bei kengem vun de 7 Punkten: also dem Kannergeld, dem Congé Parental, der Mammerent, der Zënsbonifikatioun an dem méi bëlleg notariellen Akt beim Kaf vun enger Immobilie, de Bäihëllefe fir de Schoulufank an der Erzéiungszoulag, wëll d'Asbl mat sech diskutéiere loossen. Famill 2000 appelléiert dowéinst un déi verschidde Sozialpartner, notamment d'Gewerkschaften, sech fir d'Familljen zu Lëtzebuerg , also d'Zukunft vum Land anzesetzen.

Aleba

D’Bankgewerkschaft ALEBA stellt sech op d’Säit vun den anere Gewerkschaften, mat hefteger Kritik un der Regierung hire Spuerproposen an der Tripartite.

Déi Mesure sinn eng frontal Attack op déi sozial Acquisen vun de Salariéën an hir Famillen, schreift d’ALEBA an engem Communiqué.

D’Bankgewerkschaft seet Neen zu allen Mesuren, déi d’Regierung proposéiert.

Caritas

D'Caritas ass der Meenung, dat de Spuerpak vun der Regierung d'Familljen mat Kanner ze vill staark belaascht.

Et géif Alternativen zu dem Spuerpak, seet de Coordinateur vun der Caritas, den Robert Urbé.

Zum Beispill kéinten Entreprisen a Banke méi belaascht ginn – an déi Leit, déi ee méi héicht Akommes hunn. Et misst ee sech prinzipiell froen, wéi ee Modell Lëtzebuerg fir d'Zukunft wëll.

Wann ee wielt jonke Koppelen noleeën, méi Kanner ze kréien, da misst een hinnen och entgéint kommen, an dozou gehéiert och d'Kannergeld an de Congé parental, sou nach den Robert Urbé. Dat deen elo ëm 2 Méint gekierzt gëtt, géif sech fir Elteren, déi allenzwee dovu profitéiere wëllen, duerchaus bemierkbar maachen. Well si da net dat éischt Joer, mä just nach 8 Méint laang doheem bei hirem Kand bleiwe kënnen.

ULC

Weider Kritik, dann, un de Spuermesuren, déi um Dësch leien – dës Kéier vun der ULC – der Lëtzebuerger Unioun vun de Konsommateuren. Et wiren alt nees d’Konsumenten, déi zur Kees gebuede ginn, fir de Budget ze sanéieren, esou d’ULC an engem Communiqué.

D’Finanzspekulanten als Verursaacher vun der Kris, misste keen Cent bezuelen.

D’ULC wëll drun erënneren, dass hirer Meenung no och zu Lëtzebuerg monter matgemaach gouf beim Kaf a Verkaf vun toxesche Spekulatiounspabéieren, déi d’Finanz- an duerno d’Wirtschaftskris ausgeléist hunn.

Facebook

Ronn 7.540 Member, dat war d'Zuel vun de Leit, déi sech bis de Mëtteg géint halwer 4 a 5 verschiddene Gruppen um Facebook ageschriwwen haten, fir sech géint d'Spuerpolitik vun der Regierung ze wieren.

Et gëtt hautdesdaags nämlech net nëmmen um Comptoir iwwer Politik diskutéiert, ma op de sëllechen Internetdiskussiounsforen an eben och um Facebook iwwerschloen sech d'Remarque vu rosene Bierger.

D'Reaktiounen an d'Commentaire komme quasi am Minuttentakt geflunn. D'Dynamik um Internet huet sech besonnesch no der drëtter Tripartitesronn entwéckelt. D'Zuel vun de Memberen an de Gruppen op Facebook geet bestänneg an d'Luucht. An et gëtt sech virun allem kräfteg geiergert. De Grupp "Ech si géint déi nei Spuermoossnamen vun der Regierung" huet mat 3.300 Memberen den Ament de gréissten Zoulaf. Mat Aussoen wéi "Dat doten geet eng Nummer ze wäit". "Déi Kleng ginn ëmmer bestrooft an déi Déck loosse mer alt erëm lafen" a "Wéini fänkt d’lëtzebuerger Vollek u sech ze wieren?" maachen sech d'Internauten hei Loft. Jonk an Al iergere sech, datt scho rëm de Mëttelstand bludde muss, respektiv d'Famillje gestrëppt ginn. Anerer hunn hire CSV-Facebookfrënn no der Annonce schonn d'Frëndschaft gekënnegt.

Op "Generalstreik elo", deen elo eréischt gegrënnt gouf, hu sech a 24 Stonnen iwwer 1.400 Leit ageschriwwen a sinn am amgaang fir e Generalstreik ze mobiliséieren, Leit ginn opgeruff sech ze mellen. Ween hëlleft mat organiséieren, mer brauchen Banderollen, Megaphonen an alles wat Kaméidi mécht, jidderee dee wëll matmaachen, ka sech bei mer um Facebook mellen, heescht et. En éischten Opruff ass scho fir e Méindeg um 10 Auer um Knuedler lancéiert ginn. Bal genee souvill Membere wéi deen do huet de Grupp "Fir all déi Leit déi géint d'Spuerpolitik vun der Lëtzebuerger Regierung sinn". D'Bierger musse bludden an eis Regierung gehäit Suen zu Fënster eraus z.B. fir Militärfliger asw. Dat kann et net sinn, heescht et op där Säit am Ënnertitel.

Als Diskussiounsbasis ginn iwwregens ganz vill Artikelen aus der geschriwwener Press, respektiv d'Internetversioun vu Radiosreportage benotzt, déi an de Forum verlinkt ginn.

Regierungspropositiounen vum Méindeg

Eng helleg Kou  – d'Mammerent – si soll net gestrach ginn, mä eréischt vu 65 amplaz vu 60 Joer un ausbezuelt ginn.

Ze spieren wier och dës Mesure: De Renten-Ajustement géif ausgesat – an zwar géif deen nächsten, deen 2011 fälleg ass, ewechfalen. D'Regierung huet och proposéiert, d'Kannergeld nëmmen nach bis 21 Joer auszebezuelen. Vun deem Alter un géif et un de Système vun de Boursen a Prêtsen gekoppelt.

D'Allocatioun fir d'Schoul-Rentrée géif just nach fir déi ausbezuelt, déi och eng "Allocation de vie chère" kréien.

E Congé parental soll an Zukunft net méi 6 mä maximal 4 Méint plein temps daueren. D'Erzéiungsgeld géif erofgoen.

Wat d'Steieren ugeet, soll d'Zëns-Bonification am Logement ofgeschaaft ginn – genee ewéi de bëllegen Akt, wann een een Haus oder Appartement keeft.

De Spëtze-Steiersaz soll erhéicht ginn – ëm wéi vill ass net gewosst – just – dat och een sou genannte Super-Steiersaz fixéiert soll ginn.

Eng Hausse kéim zousätzlech op eis duer bei der Solidaritéits-Steier – an da géif eng Zort Krise-Steier agefouert – déi géif op sämtlech Salairen a Revenuen – also och op Loyeren etc. erhuewen. Wéi genee dës nei Steier ausgesäit, war nach net gewuer ze ginn.

Wat d'Subventioune op Betriber ugeet, hätt d'Regierung proposéiert se ëm 10 Prozent erofzesetzen. Déi fir Gemengen solle jo och gekierzt ginn. Hei wier ënner anerem am Gespréich, dat de Staat Kläranlagen net méi wéi bis elo zu 90 Prozent, mä just nach zu 75 Prozent subventionéiert.