Regierung: Krisemesuren an homosexuellt Bestiednis beschloss
RTL - 09.07.2010, 18:04 - Fir d'lescht aktualiséiert: 09.07.2010, 21:54
De Spëtzesteiersaz gëtt vun 38 op 39 Prozent eropgesat. Deen Taux gëllt bei engem Akommes vun 41. 793 Euro un an der Klass 1 a vun 83.586 Euro un an der Klass 2.
D'Kilometerpauschal gëtt ëm d'Halschent gekierzt; dat gëllt och fir de minimale Forfait.
D'Solidaritéitssteier geet vun 2,5 op 4 Prozent fir déi physesch Persounen an d'Luucht.
Verdéngt ee méi wéi 300.000 Euro an der Classe 2, klëmmt den Taux un de Fonds de l'emploi op 6 Prozent. D'Kollektivitéiten mussen an Zukunft 5 Prozent ofgin amplaz de 4 Prozent den Ament.
D'Persoune mussen donieft nach eng speziell Krisentaxe bezuelen: An den nächsten zwee Joer ginn 0,8 Prozent vum Loun akasséiert.
Wat de "Golden Handshake" an de Betriber ugeet: All Prime de départ, déi iwwer 300.000 Euro läit, kann net méi vun der Steier ofgesat ginn.
Homosexuellt Bestiednis
Am soziale Beräich gouf dann nach d'Decisioun geholl, datt homosexuell Männer oder Fraen sollen d'Recht kréien, sech ze bestueden.
Dat bréngt mat sech, datt dës Kopplen déi nämmlecht Rechter kréien, awer och Verpflichtungen; et sollen déi nämmlecht Reegele gëllen, fir d'Bestiednes nees opzehiewen, awer och an den Ierfschaften. Et bleift just een Ënnerscheed tëscht homosexuellen an heterosexuelle Koppelen: an engem homosexuelle Bestiednes gëtt deen ee Partner net de Papp vum Kand vun deem anere Partner.
D'Adoption simple gëtt méiglech fir déi Homosexuell, egal, op se bestuet sinn oder net; an dësem Fall muss d'Persoun op d'mannst 25 Joer al sinn.
D'Adoption plénière bleift ausgeschloss, esou wéi dat och déi national Ethik-Kommissioun an den Ombutscomite fir Kanner gefrot haten.
Finanzplaz
Nach eng Decisioun, wat d'Finanzplaz ugeet: Investmentfongen, déi an d'Microfinanzen investéieren, kréien d'Taxe d'abonnement nogelooss.
Déi Fongen, déi an der Agence LuxFlag dra sinn, kréien dës Taxe automatesch nogelooss; déi aner mussen eng Demande eraginn: Si mussen op d'mannst 50 Prozent vun hirem Geld an Institutiounen vun der Microfinanz placéiert hunn.
Dat betrëfft eng 30 Fongen zu Lëtzebuerg, mat engem Aktiva vun 2,2 Milliarden Euro.
Är Commentairen
