Greenpeace: Aktioun a Ministère wéint Sotel-Sträit e Freideg

RTL - 03.09.2010, 11:16 | Fir d'lescht aktualiséiert: 03.09.2010, 12:20 | 22 Commentaire(n)

Greenpeace fënnt et inakzeptabel, dass d'Aarbechten fir de Bau vun der Héichspannungsleitung, déi d'Lëtzebuerger Netz mam franséische Netz soll verbannen, weiderginn. Schonn en Donneschdeg hunn d'Aktivisten um Site selwer protestéiert an domadder déi hirer Meenung no illegal Ofholzungsaarbechte wéinstens en Ament laang gestoppt.

Greenpeace huet och kee Versteestemech dofir, dass den zoustännege Minister Marco Schank nach net intervenéiert huet. A genee dofir stoungen d'Aktivisten fir eng weider Aktioun viru senger Dier an der Montée de la Pétrusse.

D'Banderole mam Minister drop, dee seet "Et ass kee Problem" gouf héichgehalen. Et gouf ugefaangen um Schëld vum "Ministère du Développement durable et des Infrastructures" ze fréckelen an ze schrauwen, bis op eemol en neien Panneau, mat der Opschrëft : "Ministère de la destruction durable et des infrastructures nucléaires" do houng.

Greenpeace huet de Marco Schank opgefuedert, endlech seng Responsabilitéiten ze huelen. De Minister war och bereet, mat den Aktivisten ze diskutéieren

Natierlech läit Greenpeace och de Problem vum Nuklearen um Mo, sou de Roger Spautz, deen allerdéngs och nom Gespréich mam Minister net zefridde war. Greenpeace huet schonn e Référé beim Verwaltungsgeriicht agreecht, mat der Demande de Chantier direkt ze stoppen.

Äre Commentaire